2Ch 21 | NdeIBE | STEP | Ngakho uJehoshafathi waya ekuphumuleni kubokhokho bakhe wangcwatshwa labo eMzini kaDavida. Kwathi indodana yakhe uJehoramu yathatha isikhundla yaba yinkosi.

2 Chronicles 21

1 Ngakho uJehoshafathi waya ekuphumuleni kubokhokho bakhe wangcwatshwa labo eMzini kaDavida. Kwathi indodana yakhe uJehoramu yathatha isikhundla yaba yinkosi.

2 Abafowabo bakaJehoramu, amadodana kaJehoshafathi, babengo-Azariya, loJehiyeli, loZekhariya, lo-Azariyahu, loMikhayeli kanye loShefathiya. Bonke laba babengamadodana kaJehoshafathi inkosi yakoJuda. 3 Uyise wayebanike izipho ezinengi zesiliva lezegolide kanye lezinye izimpahla eziligugu, lamadolobho abiyelweyo koJuda, kodwa ubukhosi wayebunike uJehoramu ngoba eyindodana yakhe yamazibulo.

UJehoramu iNkosi YakoJuda

4 UJehoramu esengenile esikhundleni sikayise waqinisa umbuso wakhe, wabulala bonke abafowabo ngenkemba kanye lamanye amakhosana ako-Israyeli. 5 UJehoramu waba yinkosi eleminyaka engamatshumi amathathu lambili, njalo wabusa eJerusalema okweminyaka eficamibili. 6 Walandela izindlela zamakhosi ako-Israyeli, njengalokho okwakwenziwe ngabendlu ka-Ahabi, ngoba wathatha indodakazi ka-Ahabi. Wenza okubi phambi kukaJehova. 7 Lanxa kunjalo, ngenxa yesivumelwano uJehova ayesenze loDavida, uJehova kathandanga ukuyidiliza indlu kaDavida. Wayethembise ukumbekela isibane yena kanye lesizukulwane sakhe nini lanini.

8 Ngezinsuku zikaJehoramu, abase-Edomi bahlamukela uJuda basebebeka eyabo inkosi.

9 Ngakho uJehoramu waya khonale lezikhulu zakhe lazo zonke izinqola zakhe zempi. Abase-Edomi bamhanqa kanye labalawuli bezinqola zakhe zempi, kodwa wavuka ebusuku waphunyuka. 10 Kuze kube lamhla abase-Edomi balokhu bahlamukela uJuda. AbaseLibhina labo bahlamuka ngasolesi isikhathi, ngoba uJehoramu wayefulathele uJehova, uNkulunkulu waboyise. 11 Njalo wamisa izindawo zokukhonzela emaqaqeni akoJuda, wenza abaseJerusalema ukuba bakhonze izithombe, wadukisa abakoJuda.

12 UJehoramu wemukela incwadi eyayivela ku-Elija umphrofethi isithi: “Nanku okutshiwo nguJehova, uNkulunkulu kayihlo uDavida, uthi: ‘Kawuhambanga ezindleleni zikaJehoshafathi uyihlo lezika-Asa inkosi yakoJuda. 13 Kodwa ulandele izindlela zamakhosi ako-Israyeli, waholela abakoJuda labantu base-Jerusalema ekuzingcoliseni njengalokhu indlu ka-Ahabi eyakwenzayo njalo usubulele abafowenu abendlu kayihlo ababengcono kulawe. 14 Ngakho-ke uJehova usezabatshaya abantu bakini lamadodana akho, labomkawo lakho konke okungokwakho, ngesidutshulo esikhulu.

15 Lawe uqobo uzagula umkhuhlane omubi owesifo samathumbu akho, amathumbu akho aze ahotshuke ngokuhamba kwezinsuku ngenxa yesifo.”

16 UJehova wamvusela uJehoramu ulaka lwamaFilisti lama-Arabhu ayehlala eduzane lamaKhushi. 17 Bahlasela koJuda, bangena khona bathutha zonke izimpahla ababezifumene esigodlweni senkosi, labantwabayo labomkayo. Akulandodana eyasalayo ngaphandle kuka-Ahaziya isicino sabo.

18 Ngemva kwakho konke lokhu uJehova wehlisela uJehoramu isifo samathumbu esingelaphekiyo. 19 Ngokuqhubeka kwesikhathi ekupheleni komnyaka wesibili, amathumbu akhe ahotshuka ngenxa yesifo, wafa esebuhlungwini obukhulu. Abantu bakhe abazange babase umlilo wokumhlonipha njengalokhu ababekwenza kuboyise.

20 UJehoramu waba yinkosi eleminyaka engamatshumi amathathu lambili, njalo wabusa eJerusalema okweminyaka eficamibili. Wafa engakhalelwa muntu, wabekwa eMzini kaDavida, kodwa kungesikho emangcwabeni amakhosi.